#farodeverano2022

Beste uda batez, eta laugarren urtez jarraian, #farodeverano argazki lehiaketa aurkezten dugu gure Elkartetik.

Bidali uda honetan ateratako zure argazkirik onenak! Lagunekin, familiarekin … zuk nahi duzun bezala, baina hori bai, itsasargi batean egon eta argazkian atera behar zarete.

Nahi dituzun argazki guztiak bidal ditzakezu edo sare sozialetara igo eta gu izendatu (@faroseuskadi) #farodeverano2022 hashtag-a idatziz, irailaren 4 arte.

Jasotzen ditugun argazki guztien artean itsasargien kontuak jasotzen dituzten 3 opari zozkatuko ditugu.

262968 ordu Mariorekin

Euskadiko eta Andaluziako Itsasargien Lagunen Elkarteek omenaldia egin diogu Mario Sanzi, 30 urte egin baititu Almeriako Mesa Roldan itsasargian.

Hemen duzue bere ondoan igaro genuen egun politaren laburpen txiki bat.

Almeriako itsasargiak - Argazki erakusketa

Umetatik, itsasargiek gure arreta piztu izan dute, erakarri egin gaituzte, ia hipnotizatu ere bai beren harmonia argitsu, monotono eta seguruarekin. Gero, haien benetako helburua zein den jakin dugunean, askotan babestu eta lagundu izan digute.

Orain, teknologia hain indartsu dagoen garaiotan, dena azkarregi berritzen denean, itsasargiak zalantzan jarri dira etengabe, teknologia zaharkitua dela esan izan da eta. Baina itsasargiak beti bezala mantendu dira: indartsu, tente, beren lanaz eta historiaz harro.

Itsasontzi batetik gauean itsasargi baten argia ikusteak poz, segurtasun eta konpainia sentsazio izugarria ematen digu. Bere argia mugarik, hizkuntzarik, ideologiarik gabe jasotzeko pribilegioa izateak ziklope geldi baina bizi horien existentzia justifikatzen du.

Badira ehunka giza istorio eta ehunka arrazoi itsasargiak erabiltzeko, miresteko eta etorkizunean kontserbatzeko.

Guk Almeriako itsasargien argazki batzuk erakutsi nahi ditugu, istorio zoragarri hauek beren hormen artean gorde zituzten itsasargi haienak. Gure elkarteak, Almeriako Portu Agintaritzak (APA) probintzia horretako kostaldean kudeatzen dituen itsasargiak bisitatzeko aukera izan du, argi-seinaleen dorreei argazkiak ateratzeko. Atsegin handiz bisitatu ditugu, nabigatzen laguntzeko sistemetako teknikariek eta APAko langileek lagunduta, Garrucha, Mesa Roldán, La Polacra, Cabo de Gata, Almería, San Telmo, Sabinal, Punta de Baños, Adra eta Roquetas de Mar-eko itsasargiak.

Argazki guztien artean aukeraketa bat egin ondoren, Euskadiko Itsasargien Lagunak Kultura Elkarteak argazki erakusketa bat antolatu du, "Almeriako itsasargiak" izenburupean.

Erakusketa 2022ko maiatzaren 30etik ekainaren 19ra izango da, Irungo Palmera Montero gunean (Leandro Agirretxe, 1), sarrera libre. Ordutegia: astelehenetik ostiralera 08:00h-22:00h; larunbat eta igandeetan: 10:00h-14:00h eta 16:00h-20:00h. Jai egunetan itxita.

Mikrokontakizunen lehiaketa 2022

Istorio bat, pertsonaia bat, itsasargi bat… gehienez 120 hitzetan. Mikrokontakizun bat idazteak gutxirekin asko esatera behartzen zaituen erronka bat da.

Aurtengo liburuaren eguna ospatzeko, zure asmamen eta sormen guztia ateratzea proposatzen dizugu, eta mikroipuin bat idaztea, non itsasargi batek protagonismo handia izango duen.

Parte hartzeko, zure mikroipuina helbide elektroniko honetara bidali: amigosfaroseuskadi@gmail.com, apirilaren 20 baino lehen.

Mikrokontakizun guztien artean epaimahaiak hiru irabazle aukeratuko ditu eta itsasargien kontuak jasotzen dituzten liburuekin eta gure elkarteko artikuluekin sarituko dira.

Mikroipuina euskaraz edo gaztelaniaz bidali ahal izango da, eta jatorrizkoa eta argitaratu gabea izan beharko du.

Pentsatu desberdin, ihesi topikoetatik eta animatu!

Iturria: The acoak

Jaietako zorion-mezua (2021)

EGUBERRI JAI ZORIONTSUAK ETA URTE BERRI ON!

Onde a Terra Acaba

Argia da iluntasunaren aurkako antidoto bakarra, lurra da itsasoaren segurtasunik ezaren aurrean dagoen leku bakarra, itsasargiek ezin diote itxaropenaren, erresistentzia hautsezin baten ikur izateari utzi. Galdutako bidea berreskuratzeko ilusioa, etxeko berora itzultzeko promesa eta maitatuen konpainia irudikatzen dute.

Baina itsasargiaren sinbologia ez da hemen bukatzen. Beste esanahi batzuk ere hartzen ditu, eta haien arabera itsasargiaren helburu materiala espazio infinituetara irekitako ate bihurtzen da.

Itsasargiak pertsona guztiei laguntzen eta gidatzen diela kontuan hartuta, behar duen orori desinteresatuki eskainitako zerbitzuaren ikur ere bihurtzen da. Farozainak erosotasunari uko egiten dio, bakardadearen larritasuna jasaten du, hotzari eta hezetasunari aurre egiten die, inoiz ezagutuko ez dituen arrotzak salbatzearren. Hau da, itsasargiak gizakiaren elkartasuna sinbolizatzen du.

Baina itsasargiak ez dira sinbolo bat bakarrik, errealitate ukigarri bat ere badira. Antzinate urrunenetik perfekzionatu diren eraikinak dira. Denboran eta espazioan existitzen dira eta horregatik daukate historia bat. Eta historia horren barruan, nagusiki teknikaren bilakaera dominatzeari buruzkoak badira ere, bizitzako istorio asko agertzen dira, gauza sinplez eta eguneroko keinuez eginak, norbanakoaren itxaropenez, pozez eta sufrimenduez beteak.

Guk Portugalgo hainbat itsasargiren argazki batzuk erakutsi nahi ditugu, haien horma artean istorio hunkigarri horiek gorde zituztenak. Horregatik, Euskadiko Itsasargien Lagunak Kultura Elkarteak argazki erakusketa bat antolatu du "Onde a Terra Acaba" izenburuarekin.

Erakusketa 2021eko abenduaren 1etik 19ra izango da, Irungo Palmera Montero Gunean (Leandro Agirretxe, 1). Ordutegia: AL/OR: 08:00-22:00; LR eta IG: 10:00-14:00 eta 16:00-20:00; Jaiegunetan itxita. Sarrera doan izango da.

2021eko haurrentzako marrazki lehiaketako irabazleak

Baditugu 2021eko marrazki lehiaketako hiru irabazleak!

- A kategorian: June Tellechea (4 urte).
- B kategorian: Maren García (6 urte).
- C kategorian: Adur Errazquin (10 urte).

A kategorian epaimahaia harritu egin da koloreen potentziarekin eta arrain hegalariekin.

Kai-muturraren xehetasuna eta itsasoaren indarra dira epaimahaiak B kategoriako irabazlearen marrazkian baloratu dituen alderdiak. 

Eta C kategorian epaimahaiak interpretatu du marrazkiak farozainaren istorioa, bere atseden egunean, kontatzen duela.

Zorionak irabazle guztiei! Laster jasoko dituzue zuen sariak.

Eta eskerrik asko parte hartu duzuen guztioi. Benetako artistak zarete.